Psalms 63

Shauku Kwa Ajili Ya Uwepo Wa Mungu

(Zaburi Ya Daudi. Wakati Alipokuwa Katika Jangwa La Yuda)

1 ^aEe Mungu, wewe ni Mungu wangu,
nakutafuta kwa moyo wote;
nafsi yangu inakuonea kiu,
mwili wangu unakuonea wewe shauku,
katika nchi kame na iliyochoka
mahali ambapo hapana maji.

2 ^bNimekuona katika mahali patakatifu
na kuuona uwezo wako na utukufu wako.

3 ^cKwa sababu upendo wako ni bora kuliko uhai,
midomo yangu itakuadhimisha.

4 ^dNitakusifu siku zote za maisha yangu,
na kwa jina lako nitainua mikono yangu.

5 ^eNafsi yangu itatoshelezwa
kama kwa wingi wa vyakula;
kwa midomo iimbayo
kinywa changu kitakusifu wewe.

6 ^fKitandani mwangu ninakukumbuka wewe,
ninawaza juu yako makesha yote ya usiku.

7 ^gKwa sababu wewe ndiwe msaada wangu,
chini ya uvuli wa mbawa zako naimba.

8 ^hNafsi yangu inaambatana nawe,
mkono wako wa kuume hunishika.

9 ⁱWale wanaotafuta uhai wangu wataharibiwa,
watakwenda chini kwenye vilindi vya dunia.

10 ^jWatatolewa wafe kwa upanga,
nao watakuwa chakula cha mbweha.

11 ^kBali mfalme atafurahi katika Mungu,
wale wote waapao kwa jina la Mungu watamsifu,
bali vinywa vya waongo vitanyamazishwa.